"Фотки й відео скоро ни будуть" – закарпатці жартують, як у краї святкують весілля

Як празнувуть свальбу закарпатці:

1. Сватанкы. Дві родины домовлявуться, коли бы ліпше свальбовати и приблизно кілько гостів планувуть кликати. Батькы впадавуть у паніку ош як исе всьо перебыти.

2. Ни дай Боже забыти когось покликати на свальбу, ото буде серце на всьо життя. Завто свальбы на Закарпатті великі. Май почотні гості у першых числах у списку, про што ся їм тоже слєгка наголошує.

3. Залы, фотографы, відеозйомка, ведучі, музика заказувуться на рік уперед, завто молоді ся мавуть дуже любити, обы ся свальба ни зорвала.

4. На залови ни економлять и беруть великый , обы ся стала вся родина з обох боків и вбы єґде было бігати дітьом. Танцьовати тоже має быти єґде.

5. Велика свальба-уд 400 гостів, сиридня уд 200 до 400, нивилика свальба уд 100 до 200 люди, мала свальба ото 80-100 люди, усьо што ниже 80 ото лиш гостина.

6. Типир купуєся упивка, тоже на рік уперед. Сисе тоже є доказ ож свальбі быти. Упивка ся бере з великым запасом, бо сваты сись період будуть ходити єден до другого в гості. И щи завто, обы ся на свальбі «ни вбзирати». Што ся вбстане, піде на христины.

7. Поняття «ниє гроши чинити свальбу» в Закарпаттю ниє!Гроші ся зычать, береся кредіт, продаєся корова, береся на список, идеся на заробіткы, но свальба має быти ни хуже ги в другых.

8. Перед самов свальбов даз за місяць у церкви мавуть быти огласкы , иншак свальба гонна быти нилигітимна!

9. Дале молоді обізатєльно вв’єнно мавуть кликати на свальбу гостів, заходячи до каждого в хыжу. Лишавуть запрошення и гості ся обідять, кидь у тому запрошенню ни одмічено ош їх раді відіти и на вінчаню в церкви.

10. Кликати треба файно и настойчиво, обы тот кого кличуть почуствовав ош иппен він буде самый главный гость на свальбі! Щи пак нагадати по телефону.

11. Маточку и батичка вообще треба просити пару раз, а їхні діти бажано вбы были дружбове. Иншак серце-обіда. Маточка и батичко у конверт кладуть прилічну суму.

12. Раньше свадєбный кортеж быв из усьых машин родичів, што на ходу, типир сугубо елітні моделі(май часто з Хуста)

13. Ци бідный ся женить, ци багатый, столы и так ся мавуть ламати вд їдіня. Усі блюда на свальбі будуть детально оцінені жіночов половинов гостів. Майстер-шеф пиля них выходный! Їхню критику щи ни вбыйшов ни яден ресторан Закарпаття!

14. Раньше свальбовали в шатори, якый збивали у дворі тыждинь и розбирали тыждинь, а ґазды гостили исі два тыжні усьых помагальників. Типир празнувуть лим у ресторані. Обізатєльно має быти козацькый стіл, фруктовый кейтерінг и кенді-бар.

15. За Козацькым столом цілу свальбу будуть стояти знатокы самогоноваріння, завто оба сваты мавуть добре подумати, што туды покласти! Палинка має быти гладка, сильна, з вінцьом, пахнути продуктом, з якого зварена. Усякі віскі, кальвадосы, текілы кладуть лим для понтів, бо реально п’ють усі лим домашню.

16. Колись дружкы з дружбами ишли прибирати креповыми лентами зал, шариками машины и йсе быв повод познакомитися ближе, типир сисю роботу роблять флористы. Завто типир дружба и дружка сидять цілу свальбу в Інтернеті.

17. Торта. Колись її приносила на свальбу маточка и спеціально запожджувалася, обы усьым залом из тов тортов ся пройти(дотідь ся свальба ни починала и вту маточку уже всі чекали дуже голонні и злі). Щи маточка до торты несла двох баранів из крема. Типир торта стойить у залі и на файнів свальбі она уд Штефаньо вадь уд Юрика з Ільниці!

18. Колачів на свальбі має быти дуже много, вбы єшто паковати гостям из собов, вбы свіні и кури тоже почуствовали, што вто закарпатська свальба.

19. На свальбі всіх інтересує ци не беременна молода, де будуть жити молоді и кілько гроши было платя молодої.

20. Першый таниць никавуть усі и молоді мавуть свойим танцьом убідити усьых ош як они ся страшно люблять!Докідь молоді танцювуть, кось из батьків везе домі ташку з конвертами, обы ся з нив дашто ни стало.

21. Музика. Багата свальба позволить собі Марину і компанію, не дуже багата закаже другых співаків, а бідна свальба закаже лем діджея з магнітофоном. Но на любів свальбі гості ся ділять на три групы меломанів:перша-молодьож, які тирпіти ни гонни живу музику, друга-середнє покоління, які тирпіти ни гонни сучасноє гупаня з динаміків и тритя група-старшоє покоління, які усмівуть свальбу, кидь їм ни дали затягти вживу народні пісні.

22. На закарпатськів свальбі дуже люблять силовати упити и пак за п‘яного впувісти ош як ся він напив!Сокотіться!Палинка сильна!Діточкы втихаря тоже гонни упити пива, ліпше діти без нагляду ни лишати.

23. На свальбі треба файно погостити ведучого, фотографа і відеооператора, бо дуже часто в суматосі за сих люди забывавуть. А щи треба їм домі мало штось спаковати, товды за вашу свальбу будуть файні отзывы.

24. У май пошлых конкурсах участвувуть свідкы. Ведучый вообще любить ся іздівати з дружок и дружбовів. Жинаті ліпше в конкурсах ни участвувуть, обы ни было пак свады дома.

25. Гості на свальбу вбиравуться паранно. Жоны чинять такі причоскы, што ставуть ниузнаваємі. Файні манери на началови свальбы ближе д півночи щезавуть и начинаться настояща гулька.

26. Усі жоны беруть на свальбу перевбутися. У чардаши всі зганявуть лишні калорії и чинять місто в чириві на горячі блюда. Ко ни танцює, тот наблюдає за другыми, а йсе опасно.

27. Діти вискавуть, бігавуть, розказувуть віршикы на камеру, пак сплять на стільцях.

28. Битка на свальбі ото частоє событіє! Так ся притирає родина д родині.

29. Молоду мавуть украсти и просити за ниї выкуп. Исе опасный конкурс, бо молодый ревнує. А кідь молоду повели щи й на дісков, та най ся не приказує!

30. Много тостів, віршів, притчів про метелика, усі гойкавуть горько, молоді мавуть пудыйти з погаром до каждого гостя и подяковати. Насправді молоді ледвы чекавуть, коли підуть спати и личити гроші.

31. Батькы з обох сторін тоже мавуть обыйти всьых гостів и посиловати, заговорити, пофіґльовати. Чим більше раз їм ся вдасть пудыйти, тым ся свальба в рейтингу май пуднимать.

32. Свальба має быти до рана, ото ганьба кидь ся свальба розыйшла попівночи. Значить ни силовали, ни спирали гостів, было ни інтересно, но сякоє велика рідкість на Закарпатті.

33. На другый динь мавуть быти поправкы и всі ся гості кличуть назад, но приходять лим самі близькі. Нараз усьых інтересує ци вернулася свальба.

34. Фоткы й відео скоро ни будуть, бо їх типир будуть монтіровати піврока, так што розщитуйте увідіти себе на свальбі дись на христинах. 3

5. Свальбу и поведінку гостів щи довго будуть обсуждати в родинах, бо Ищи ся тот ни вродив, Ко свальбі вгодив! Гірко молодим!

Маріка Данканич